10 Juni 2017

STANDARD CHARTERED WAPANDA MICHE YA MITI 400 SHULE YA MSINGI VIWEGE, WAKABIDHI NA KOMPYUTA 10

Na: Hashim Jumbe
Benki ya Standard Chartered mwaka huu wa 2017 ikiwa inatimiza miaka 100 tangu ianze kutoa huduma Nchini Tanzania, wameitumia siku ya leo kupanda miche ya miti 400 yenye matunda na miti yenye kuleta vivuli Shule ya Msingi Viwege pamoja na kukabidhi Kompyuta 10 zitakazotumika kufundishia somo la TEHAMA shuleni hapo.

Standard Chartered ni miongoni mwa Wadau wakubwa wa elimu na uhifadhi wa mazingira kwa Manispaa ya Ilala, ikiwa sasa ni mwaka wa nne tangu waanzishe kampeni ya kupanda miche ya miti kwa Shule za Msingi za Manispaa ya Ilala.

Kampeni ya upandaji miti 20,000 pamoja na kutoa kompyuta kwa Shule za Msingi Manispaa ya Ilala, tangu ianze hadi sasa Standard Chartered wameshapanda miche ya miti 400 kwa Shule ya Msingi Pugu Kajiungeni, miche ya miti 350 pamoja na kompyuta 10 kwa Shule ya Msingi Kimwani, miche ya miti 350 na kompyuta 10 kwa Shule ya Msingi Buyuni.

Shule nyengine zilizonufaika na msaada huo ni pamoja na Shule ya Uhuru Mchanganyiko na Shule ya Msingi Kigogo fresh ambazo nazo kila moja zilipata kompyuta 10 na miche ya miti 350




Afisa Elimu Manispaa ya Ilala Bi. Elizabeth Thomas ambaye amemuwakilisha Mgeni Rasmi  Mkuu wa Wilaya ya Ilala Mhe. Sophia Mjema akitoa salamu za Mkuu wa Wilaya wakati wa zoezi la kupanda miche ya miti shule ya Msingi Viwege


Muwakilishi wa Benki ya Standard Chartered ambaye ni Mkuu wa Kitengo cha Udhibiti cha Benki ya Standard Chartered Bw. Abdulsamad Abdul akitoa salamu kwa niaba ya benki hiyo


Muwakilishi wa Benki ya Standard Chartered ambaye ni Mkuu wa Kitengo cha Udhibiti cha Benki ya Standard Chartered Bw. Abdulsamad Abdul aliyesimama upande wa kulia, akimkabidhi kompyuta Mkuu wa Shule ya Msingi Viwege, Mwalimu Ferdnand  Nyambaya

Muwakilishi wa Mkuu wa Wilaya ya Ilala ambaye ni Afisa Elimu Msingi Manispaa ya Ilala Bi. Elizabeth Thomas akipanda mti shule ya Msingi Viwege
Muwakilishi wa Benki ya Standard Chartered ambaye ni Mkuu wa Kitengo cha Udhibiti cha Benki ya Standard Chartered Bw. Abdulsamad Abdul akishiriki kwenye upandaji wa mti shuleni Viwege




Wanafunzi wa Shule ya Msingi Viwege wakipanda miche ya miti shuleni kwao

MKURUGENZI MANISPAA YA ILALA ASHIRIKI FUTARI NA WANAFUNZI WENYE UHITAJI MAALUM, NAIBU MEYA ATOA AHADI YA MBUZI

Na: Hashim Jumbe
Ramadhani ya 13, Naibu Meya, Mkurugenzi wa Halmashauri ya Manispaa ya Ilala, pamoja na Watendaji wengine kutoka Idara ya Elimu Msingi na Idara ya Fedha Manispaa ya Ilala, wameitumia kujumuika kwenye futari na Wanafunzi wanye mahitaji maalum kutoka shule ya Msingi Uhuru Mchanganyiko na Shule ya Viziwi ya Buguruni.

Futari hiyo iliyoandaliwa na Mkurugenzi wa Manispaa ya Ilala, ilikuwa na lengo la kuimarisha ukaribu kati ya Wanafunzi, Walimu, Walezi pamoja na Viongozi wenye dhamana na Wanafunzi hao.

Akiongea wakati wa futari hiyo, Naibu Meya Manispaa ya Ilala, Mhe. Omary Kumbilamoto alisema "Binafsi nilikuwa sijui kuwa Wanafunzi hawa wa kwetu wana uhitaji mkubwa wa huduma pamoja na mambo mengine muhimu, siku zote tumekuwa tukitoa misaada kwa Watu wengine, kumbe tuna Watoto wenye uhitaji zaidi, sasa ninawaahidi nitarudi tena kuwatembelea na nitawaletea Mbuzi wawili"

Wanafunzi wenye uhitaji maalum toka shule ya Msingi Uhuru Mchanganyiko na Buguruni Viziwi wakipata futari ya pamoja iliyoandaliwa na Mkurugenzi wa Manispaa ya Ilala
Mkurugenzi wa Manispaa ya Ilala, Bw. Msongela Palela akizungumza na Wanafunzi pamoja na Waalikwa wengine waliohudhuria kwenye futari hiyo iliyoandaliwa na Mkurugenzi wa Manispaa ya Ilala
Naibu Meya Manispaa ya Ilala, Mhe.Omary Kumbilamoto akizungumza wakati wa hafla ya futari iliyofanyika shule ya msingi Uhuru Mchanganyiko
                                   

MANISPAA YA ILALA VINARA UMITASHUMTA MKOA WA DSM KWA MWAKA WA PILI MFULULIZO

Na: Hashim Jumbe
Halmashauri ya Manispaa ya Ilala imefanikiwa kushinda Ubingwa wa Jumla wa mashindano ya UMITASHUMTA kwa Mkoa wa DSM kwa mwaka 2017, ikiwa ni mara ya pili mfululizo.  Ubingwa huo unafuatia ushindi wa Mpira wa Miguu kwa Wavulana, ushindi wa Mpira wa Miguu kwa Wanafunzi wenye mahitaji maalum na ushindi wa jumla wa riadha.

Mbali na ushindi huo, Wanafunzi wa Manispaa ya Ilala wameongoza pia kwenye idadi ya Wanafunzi wanaokwenda kuunda timu ya Mkoa wa DSM kwa ajili ya Mashindano ya UMITASHUMTA Ngazi ya Taifa yanayotarajiwa kufanyika Jijini Mwanza katikati ya mwezi huu. Idadi ya Wanafunzi toka Manispaa ya Ilala ni 30 kati ya Wanafunzi 97 huku Walimu na Waratibu toka Ilala wanaokwenda kwenye timu ya Mkoa ikiwa ni Wanne.
Maandamano ya Wanafunzi, Walimu na Wakufunzi walioshiriki UMITASHUMTA Mkoa wa DSM, yakipita mbele ya Mgeni Rasmi wakati wa kilele cha mashindano hayo yaliyoendeshwa kwa siku tano kwenye viwanja vya Uhuru na DUCE






Mgeni Rasmi kwenye ufangaji wa mashindano hayo ambaye alimuwakilisha Katibu Tawala Mkoa wa DSM, Bw.Kiduma Mageni akiongea na washiriki wa UMITASHUMTA kwa mwaka 2017 pamoja na kutoa salamu za Katibu Tawala Mkoa wa DSM, Bi. Theresia Mmbando











Afisa Elimu Msingi Manispaa ya Ilala, Bi. Elizabeth Thomas akikabidhiwa kombe la Ushindi wa Jumla UMITASHUMTA Mkoa wa DSM na Mratibu wa UMITASHUMTA Wilaya ya Ilala